Monday, May 6, 2013

සහනය

සඳ සෙමෙන් බසින - නුබ ගැබේ කොනක
හෙමි හෙමින් එබෙන - ළහිරු කැන් පොදක
විඩා බව පිරුණ - තවත් එක් දිනෙක
ඇරඹුමක ලකුණු - සිහිකරයි මතක

සයනයේ කොනක - උණුහුමට නතුව
තව තවත් මටම - ගුලි වෙන්න පැතුව
ටිකිරි පැටි කෙල්ල - පොරෝණෙක එතුව
කොඳුරමින් හඬයි - මා ළඟක නැතුව


තුරුළුවී දුවට  -  ගුලිවෙලා ඉන්න
හුරතලෙන් වදන් - හෙමින් මුමුණන්න
ඉඩක් නැති මවට - එපා ඔරවන්න
සමු දෙන්න දුවේ - දවස අරඹන්න

හිමි සඳුට පුතුට  - සීනි කිරි කහට
අම්මාට වෙනම - සීනි නැති කහට
හදාගෙන  රැගෙන - ගියත් මා ළඟට
දැනෙයි බෝ වෙහෙස - විඩාබර ගතට

උදේ බත සමග - දවල් බත එකට
මාළුපිණි වෙනම - ඇතිලියට  දෙකට
ගිණි ගසා පිසිමි - කියමි රස කුමට
නිවා කුස ගින්න - ගිනි තබයි සිතට

යුද්ධයක් වගේ - ගෙවුණු පැය දෙකක
නිමාවක් නැතත් - ලැබුනු ඉසුඹුවක
පනාවක් ගසා - නැගි කියුඹු රැලක
මුව දොවා ගනිමි - ලකුණු ඇති දුකක

යුද්ධයක ලකුණු - තිබෙන වැඩ ගොඩක
නිමාවක් නොවන - කොමාවක් තබන
බිරිඳ චරිතයෙන් - මිදෙමි මා හනික
කන්තෝරු ලියකි - සාරියක එතුන

කන්තෝරු කාමරේ - ගෙවන පැය අටම
යන්තරය වගේ - තවම නැත ඉවර
කොතෙක් වැඩ කළත් - ඉසුඹු නොම ලැබෙන
ගෙදර තව සැපයි - දහස්වර සිතින

හති දමන් දුවන - කටුක දිවි ගමන
කොතනවත් නොමැත - සිත පතන සහන
දරු පැටවු සමග - නුඹේ ළඟ හිඳින
රැය පමණි සුවය - මා නිතින් විඳින

Friday, September 28, 2012

නොවැටහීම

කුලගෙය දෙදරා බිඳී වැටෙද්දී
දුක්ගිනි උහුලා හඬා වැටෙද්දී
නුඹ වෙත බැඳුනෙමි කාටත් රහසින්
ළංවී සුරතින් කඳුළ පිසිද්දී

අසෙනිය කුසුමන් හද තුළ පිපුණා
අදහන්නට බැරි සතුටක් දැණුනා
හිනිමං බැන්දත් ළං වෙන්නට බැරි
අහස ඇවිත් මා ළඟින්ම උන්නා

පපුතුර නුපුරුදු සුවඳක් දැනුනා
තවත් කඳුළු එහි රැඳිලා තිබුනා
මටත් වඩා නුඹෙ පහසින් සැනසූ
තවත් රිදුනු සිත් ඇති බැව් හැඟුනා

හිරු සඳු තරු අහසේ දිළිසෙද්දී
අහසේ පැහැබර බව වැඩි වෙද්දී
මා පොළවේ දුහුවිළි කඳුළක් බව
පමා වැඩියි මගෙ හිතට දැනෙද්දී

Thursday, January 12, 2012

එපා යන්න ඉමෙන් එහා...

එපා යන්න ඉමෙන් එහා...

උස අත්තක මලක් වෙලා නුඹ පිපිලා තිබුනා
තටු සලමින් බඹරලියන් නුඹ අසලින් රැඳුනා
පියාඹන්න අත්තටු නැති මට හරි දුක හිතුනා
ඒ උනාට උදේ හවා ඈතින් නුඹ පෙනුනා

තටු නැතිමුත් බිම හුන් මට නුඹේ සුවඳ දැනුනා
ඒ සුවඳට හිමි නැතිමුත් මගෙ හද ලොබ බැඳුනා
ඉහලින් සිටි නුඹ හට මා නොපෙනෙන බව හැඟුනා
නුඹ නොදකින අසරණ මගෙ හිත හොඳටම රිදුනා

සිප ගන්නට බැරි වුනාට නුඹ පිසගෙන හමනා
මඳ පවනේ නුඹේ සුවඳ පොද දැවටී තිබුනා
ඒ සුවඳින් ළය පුරවාගෙන මා දිවි ගෙවනා
එපා යන්න ඉමෙන් එහා මගෙ දෑසට පෙනෙනා


***

Friday, March 18, 2011

හමුවීම

ඔහුගෙන් ,
හමුවී නොදොඩා බලා හිඳ හේතුවක් නොදන්වා නිහඬවම සමුගත් ඇයට....

ගණ නිල් වළාපෙල මැද හිරු කිරණ සිඹ
සමුදුරු තෙරක හිඳ සුසුමක පහස ලැබ
හොරැහින් සිනාසී සඟවන කඳුළ දැක
මගෙ හැඟුමන් වලට දුක එක් කලා ඇය

ඇයගෙන් ඔහුට....
පෙර දින සයුරු තෙර දී මුව මඬල සිඹ
හැරගිය පළමු පෙම සිහියට ගෙනේ ඔබ
නොලැබෙන සිහින සුවඳක් වන් නුඹව දැක
හොරැහින් බලා සැනසී හද බඳී ලොබ

Tuesday, July 20, 2010

මිළින වෙලා යන්න එපා


ළඟින් මගේ ඉන්න
එපා දුරක යන්න
මා හැර යන්නට සිතුවේ
කෙළෙසද පවසන්න .

තව පොඩ්ඩක් ඉන්න
මට නම් බෑ යන්න
උයන් තෙරේ එදා රැඳී
කී ලෙස මුමුණන්න .

තිසරු ළමැද උන්න
වැහැරීගෙන යන්න
හේතු උනේ පිය පදවිය
නුඹ වෙත පුද දුන්න .

මගෙන් ඉවත යන්න
නොනිත් වෙහෙස ගන්න
නුඹ දුන් දුක හේතු උනා
මා ගත වැහැරෙන්න .

නුඹ මා වෙත දුන්න
සෙනේ නොසෑහෙන්න
සිහිනෙන් ගත තවරාලූ
මුදු සුවඳක් වැන්න .

නුඹ මගේම වෙන්න
නුඹ මා ළඟ ඉන්න
මිළින වෙලා යන්න එපා
පිපුණු පැතුම් ගොන්න.